Tilshunoslikning zamonaviy yo‘nalishlaridan biri bo‘lgan lingvopoetika tildagi badiiylik, obrazlilik, estetik ta’sirchanlik va ularning nutq jarayonida amalga oshish mexanizmlarini o‘rganadi. Ushbu yo‘nalishning shakllanishi adabiy matnlarni lingvistik nuqtayi nazardan tadqiq etish zaruratidan kelib chiqqan bo‘lib, unda til birliklarining faqat grammatik yoki semantik xususiyatlari emas, balki ular orqali yaratiladigan badiiy-estetik effekt ham muhim ahamiyat kasb etadi.