Real suyuqlik oqqanda uning ayrim qatlamlari bir-biriga shu qatlamlarga urinma ko‘rinishda yo‘nalgan kuchlar bilan o‘zaro ta’sirlashadi. Bu hodisaga ichki ishqalanish yoki qovushqoqlik deyiladi. Qovushqoq suyuqlikning ikkita qattiq plastinka orasidan oqishini ko‘rib o‘tamiz, ulardan pastkisi qo‘zg‘almas bo‘lib, yuqorigisi υ tezlik bilan harakatlanadi. Suyuqlikni shartli ravishda bir necha qatlamlardan iborat deb tasavvur qilamiz. Tubiga „yopishgan” qatlam harakatsiz. Tubidan (pastki plastinkadan) uzoqlashgan sari suyuqlik qatlamlari katta tezlikka ega bo‘lib boradi (υ1 < υ2 < υ3... va h.k. ) yuqorigi plastinkaga yopishgan qatlam yaqinidagi tezlik eng katta bo‘ladi.