Ushbu jinoyatning obyekti mulkchilik shaklidan qat’i nazar, korxonalar, muassasalar, tashkilotlarda ishlayotgan shaxslarning mehnat sharoitlarini tartibga soluvchi ijtimoiy munosabatlar hisoblanadi. Korxonalar, muassasalar, tashkilotlarda nafaqat doimiy, shu bilan birga vaqtincha ishlayotgan shaxslar ham jabrlanuvchi bo‘lishlari mumkin. Jinoyat obyektiv tomondan o‘rtacha yoki og‘ir tan jarohati yetkazilishiga sabab bo‘lgan: texnika xavfsizligi; sanoat sanitariyasi; mehnatni muhofaza qiluvchi boshqa qoidalarning buzilishidan iboratdir. Subyektiv tomondan jinoyat aybning qasd yoki ehtiyotsizlik shakllari orqali sodir etiladi.