Oldi-sotdi shartnomasi haq baravariga tuziladigan (pulli) shartnoma hisoblanadi. Har doim sotuvchi topshiradigan mol-mulk (tovar) evaziga sotib oluvchi muayyan miqdorda pul (so‘m, valyuta) bilan belgilangan haq to'laydi. Oldi-sotdi shartnomasi konsensual shartnomalar guruhiga mansub. Shartnoma bo‘yicha taraflar o‘rtasidagi huquq va majburiyatlar shartnomaning barcha muhim shartlari to‘g‘risida o‘zaro kelishilgan va shartnoma tegishli shaklda rasmiylashtirilgan vaqtdan boshlab vujudga keladi. Shartnoma munosabatlari tarkibiga ko‘ra, u ikki tomonlama shartnoma bo‘lib hisoblanadi.