Ijtimoiy-iqtisodiy jarayonlarni tartibga solishda davlat shakllangan ijtimoiy- iqtisodiy holat, to‘plangan tajriba, tanlangan rivojlanish modeli va strategik maqsadlaridan kelib chiqib o‘zgarib turuvchi usullar va vositalardan foydalanadi. Huquqiy tartibga solish o‘z ichiga turli mulk shaklida bo‘lgan korxonalar va bozor tarkiblari (birja, banklar, aksiyadorlik korxonalari) faoliyat ko‘rsatishi me’yorlarini ta’minlovchi qonunlarni ishlab chiqish va qo‘llash, antimonopol tartibga solish, iste’molchilar huquqlari va jamiyat manfaatlarini himoya qilish, tadbirkorlar va yollanma ishchilar o‘rtasidagi vositachilik va hokazolarni qamrab oladi.