Ijtimoiy takror ishlab chiqarish jarayonlarining samarali amalga oshirilishi ko‘p jihatdan moliyaviy resurslarga bog‘liq bo‘ladi. Pul vositasida takror ishlab chiqarishning bir bosqichidan boshqasiga o‘tiladi hamda muayyan maqsadga yo‘naltirilgan fondlar vujudga keltiriladi. O‘z navbatida bu fondlar takror ishlab chiqarishning uzluksizligini va kengaytirilishini ta’minlaydi. Yalpi milliy mahsulotni yaratish, taqsimlash va undan foydalanish jarayonida pul mustaqil harakat qilib, turli xo‘jalik yurituvchi bo‘g‘inlar, uy, dehqon, fermer, jamoa, kasanachilik xo‘jaliklari, davlat korxonalari va tashkilotlari, davlatning o‘zining pul mablag‘lari fondini tashkil etadi. Pul fondlari hosil bo‘lish manbalari va amal qilish tavsifi, maqsadlari va foydalanish usullariga qarab moliya va kredit shakllari tusini oladi. Ushbu mavzuda moliyaning mazmuni, vazifalari tizimi, uning asosiy bo‘g‘ini bo‘lgan davlat budjeti va budjet mablag‘larining shakllanishida soliqlarning roli, pul muomalasi va uning amal qilish qonuniyatlarining mazmuni, kredit tizimi, banklar va ularning bozor iqtisodiyotidagi roli bayon etiladi.