Korxona mustaqil xo‘jalik subyekti sifatida mahsulot ishlab chiqarish va sotish, ishlar bajarish, xizmat ko‘rsatish faoliyatini amalga oshiradi. U o‘z faoliyati doirasida mulkchilik huquqi asosida o‘ziga qarashli mol-mulkdan foydalanadi, ishlab chiqarish va iqtisodiy birlikni tashkil etadi. Korxona tarkibiy qismlari – sexlar va uchastkalardan iborat bo‘lib, ular ishlab chiqarish jarayonining ma’lum vazifalarini bajaradi. Korxonaning asosiy maqsadi iste’molchilarning talablarini qondirish, foyda olish va mehnat jamoasi hamda mulk egasining manfaatlarini ta’minlashdan iborat. Korxona tashkil etilishi qonun hujjatlariga muvofiq amalga oshiriladi va u o‘z faoliyatini nizom asosida olib boradi.