So‘nggi yillarda respublikamizda qishloq xo‘jaligiga mo‘ljallangan yerlardan oqilona foydalanish va ularni muhofaza qilishga oid tizimli ishlar amalga oshirilmoqda. Haqiqatan ham qishloq xo‘jaligiga mo‘ljallangan yerlardan foydalanish va ularni muhofaza qilish mamlakatimiz oldida turgan dolzarb vazifalardan biridir. Yerning tabiiy resurs sifatida shunday alohida xususiyati borki, unga to‘g‘ri munosabatda bo‘linsa, uni muhofaza qilish to‘g‘risida g‘amxo‘rlik qilinsa hosildorligi doimo oshib boradi. Mamlakatimizda agrar sohani har tomonlama rivojlantirishga, qishloq xo‘jaligiga mo‘ljallangan yerlarni muhofaza qilish va ulardan oqilona foydalanishga qaratilgan keng ko‘lamli islohotlar amalga oshirilmoqda. Qishloq xo‘jaligi yerlarida yetishtirilayotgan mahsulotlar aholi moddiy turmush tarzini yaxshilash, kundalik ehtiyojlarini qondirish bilan birgalikda davlat iqtisodiyotining yuksalishiga zamin bo‘lmoqda.