Turistlarga xizmat ko‘rsatishda sayohat mobaynida ko‘pgina turli korxona va tashkilotlar ishtirok etadilar. Ularga joylashtirish vositalarini taklif etadigan korxonalar (mehmonxonalar, turbaza, mehmonxona), ovqatlantirish korxonalari (restoran, kafe, oshxona), ekskursiya xizmatlarini yetkazib beruvchi firmalar, transport kompaniyalari va korxonalari, shou, kino, video va boshqa shunga o‘xshash korxonalar, sport korxonalari va inshootlari, rekreatsion korxonalar, maishiy firmalar, savdo boshqa tashkilotlar kirishi mumkin. Turistlarga kompleks xizmat ko‘rsatishda qatnashadigan barcha korxona va tashkilotlarni amaliyotda xizmatlar yetkazib beruvchilar deb atash qabul qilingan. Turmahsulot harakatida va uni tashkil qilishda turoperator muhim o‘rinni egallasada, turistlarga xizmat ko‘rsatishda xizmatlar yetkazib beruvchilarni ham unutmaslik kerak. Pirovardida, turistlar bilan kontakt xizmat ko‘rsatish darajasida yuz beradi, ya’ni turning turist tomonidan sifatli mahsulot sifatida qabul qilinishi ko‘p jihatdan ko‘rsatiladigan har bir alohida xizmat sifatiga bog‘lik. Shuning uchun tur dasturlarini tuzishda xizmatlar yetkazib beruvchilarga katta ahamiyat beriladi.