Mamlakatimiz mustaqillikka erishgan dastlabki yillardayoq “Lotin yozuviga asoslangan o‘zbek alifbosini joriy etish to‘g‘risida”gi qonunning qabul qilinishi ona tilimizning keyingi taraqqiyotiga katta ijobiy ta’sir etadigan voqea bo‘ldi. O‘tgan qisqa muddat ichida maktabgacha ta’lim muassasalari, o‘rta umumta’lim maktablari, akademik litseylar, kasb-hunar kollejlari, oliy o‘quv yurtlarida ta’lim-tarbiya, ish qog‘ozlari yuritish jarayoni yangi alifbo va imlo qoidalariga o‘tkazildi. Korxona va tashkilotlarda ham bu muddat ichida ish yuritishni davlat tiliga o‘tkazish barobarida yangi alifbo va imloga tayanilmoqda.