Darsning maqsadi o'lchov vositalarini sinash, kalibrlash va sertifikatlash jarayonini o'rganish. Foydalanish jarayonida o'lchov vositalarining xususiyatlari o'zgarishi mumkin. Sinov natijalari o'lchov vositalarining o'lchash ko'rsatkichlarini keyingi foydalanish jarayonida normativ hujjatlarda belgilangah dastlabki ko'rsatkichlarga mosligini tasdiqlovchi tegishli hujjatlar shaklida rasmiylashtiriladi. O'lchov vositalarini metrologik attestatsiya qilish yagona namunalarda ishlab chiqariladigan yoki O'zbekiston hududiga yagona namunalarda olib kiriladigan o'lchov vositalarining xossalarini sinchiklab tadqiq etish asosida ularning qo'llanish uchun haqqoniy ekanligini metrologiya xizmati tomonidan e’tirof etilishini ko'zda tutadi. O'lchov vositalarini tekshiruvdan o'tkazish (o'lchov vositalarini sinash) o'lchov vositalarining belgilab qo'yilgan texnik talablarga muvofiqligini aniqlash va tasdiqlash maqsadida davlat metrologiya xizmati organlari yoki vakolat berilgan boshqa organlar, tashkilotlar tomonidan bajariladigan operatsiyalar majmuidan iborat. Tekshirish vaqtida metrologik tavsiflarni baholash bilan bir qatorda, agar kerak bo'lsa, o'lchov vositalarining xavfsizlik xususiyatlarini baholash amalga oshiriladi.