Qadim zamonlarda odamlar ma’lumotlarni qoya toshlarga rasm ko‘rinishida saqlash orqali ularni o‘zidan keyingi avlodga yetkazishgan. Bu kelgusi avlodni ma’lum bir xatarlardan himoya qilishga yordam bergan. Keyinchalik yozuvning paydo bo‘lishi va axborotni aniqroq tasvirlash vositasi sifatida qo'llanilishi axborot bilan ishlash jarayonini yangi bosqichga olib chiqdi. Kitob, gazeta, jurnal kabi axborot manbalarining paydo bo‘lishi esa ma'lumotlarni tartibli saqlashga va insonlarning yanada bilimli bo‘lishiga yordam bermoqda. Kishilik jamiyatining aqliy jihatdan rivojlanishi yangi texnologiyalarning yaratilishiga va axborotlardan samarali foydalanish usullarining paydo bo'lishiga olib keldi. Jumladan, ma’lumotlar bazasi axborotlardan foydalanishdagi samarali usullardan biri hisoblanadi.