Quritish deb konsistentsiyasi qattiq, zich, yumshoq, pastasimon yoki suyuq materiallar tarkibidan namlikni issiqlik yordamida bug’latish va hosil boʻlgan bug’ni olib ketish jarayoniga aytiladi. Quritish tezligi koʻpgina hollarda quritilayotgan mahsulot tarkibidagi namlikning ichki diffuzion koʻchish tezligiga bog’liqdir. Koʻpgina oziq-ovqat mahsulotlarini ishlab chiqarishda quritish bajarilishi shart boʻlgan jarayon hisoblanib, odatda u koʻp energiya talab etuvchi texnologik bosqichlardan biridir. Quritish natijasida tayyorlanadigan mahsulot sifati koʻpincha foydalaniladigan texnologik uskunalar va tanlangan quritish rejimiga bog’liqdir. Quritishda mahsulot tarkibidagi namlikni boshqa usullar bilan ham chiqarish mumkin, masalan presslarda siqish, tsentrafugalash va h.q.. Lekin bunday mexanik usul bilan faqatgina erkin holdagi namlikning ma’lum bir qismini chiqarib olish mumkin boʻladi xolos. Quritishga turli agregat holatidagi (granulli, shaklli va donador, pastasimon, suyuq, suspenziyali va eritmali) oziq-ovqat mahsulotlari yoʻnaltiriladi.