Ona tili darsliklarida berilgan ayrim mavzularni munozara shaklida o’tkazish ham yaxshi samara beradi. Munozara darslarini tashkil etishning o’ziga xos texnologiyasi mavjud. O’qituvchi munozara shaklida o’tkazilishi mumkin bo’lgan mavzuni tanlaydi va uni o’quvchilar e’tiboriga havola qiladi. O’quvchilar tanlangan mavzuni “shturm” qiladilar va muammoga tegishli ma’lumotlarni atroflicha o’rganadilar. O’qituvchi o’quvchilarga aqliy hujum topshirig’ini beradi va uning qoidalarini tushuntiradi. O’quvchilar muammo echishga oid fikrlarini bir necha variantlarda ifoda qiladilar, lekin hech qaysi fikr tanqid ostiga olinmaydi. Imkon qadar o’quvchilarning ko’proq fikr bildirishlariga sharoit yaratiladi. Mavzu yuzasidan to’g’ri va tugal munozarani tashkil etish o’qituvchining mahoratiga bog’liq. O’qituvchi munozara muhitini yaratish va o’quvchilarni munozaraga jalb qilish uchun ishni bir necha bosqichga bo’lishi va har bir bosqich uchun tegishli mashqlar va yo’naltiruvchi savollarni belgilab olishi zarur.