Tarixiy taraqqiyot davomida maxsus ehtiyojli bolalarga bo‘lgan e’tibor turli davrlarda turlicha kechgan. Ishlab chiqarish kuchlari hali rivojlanmagan, madaniy va ma’naviy qadriyatlar shakllanmagan, inson hayoti tabiat kuchlariga bog‘liq bo‘lgan dastlabki davrlarda bunday shaxslar jamiyat e’tiboridan chetda qolib kelgan, hatto ularga nisbatan salbiy munosabat hukm surgan. Jamiyatning iqtisodiy taraqqiyoti, ishlab chiqarish kuchlarining rivojlanish darajasi ta’lim, madaniyat, fan va sog‘liqni saqlash ijtimoiy ong holati bilan bog‘liq holda turli davrlarda atrofdagilarning kamolotida jismoniy yoki ruhiy kamchiligi mavjud shaxslar bilan o‘zaro munosabatlari turlicha ko‘rinishga ega bo‘lgan. Bunda har bir xalqning milliy qadriyatlari, dunyoqarashi, an’analari, urf-odatlari ham muhim rol o‘ynagan. Masalan qadimgi Sparta (Gresiya)da jismoniy nuqson bilan tug‘ilgan bola jamiyat uchun yaroqsiz hisoblanib, hayotining birinchi kunlaridanoq o‘limga mahkum etilgan.