Malakaviy amaliyotni o‘tish natijasida talabalar quyidagi xujjat va materiallarni taqdim etishlari lozim: Amaliyot kundaligi, Malakaviy amaliyot hisoboti. Amaliyot kundaligi amaliyot o‘tish joyida kundalik vazifalarni bajarilishi haqidagi qaydlardan iborat bo‘lib, kundalik rahbarning imzosi bilan tasdiqlangan bo‘lishi kerak. Shu bilan birga kundalik hujjat sifatida talabaning amaliyotga kelgan va qaytgan sanasi, hamda talabaga berilgan tavsifnoma rahbarning imzosi va korxona muhri bilan tasdiqlanishi kerak. Malakaviy amaliyot hisoboti kirish, asosiy qism, xulosa, foydalanilgan adabiyotlar va ilova qismlaridan iborat bo‘lib, tushintirish yozuvlari adabiy tilda, xatosiz yozilib, texnikaga oid so‘zlar o‘z o‘rnida aniq ishlatilib, qo‘yilgan masala mavzusini to‘la yoritib, butun, tugallangan bo‘lishi lozim. Yozuv aniq va chiroyli yozilishi zarur. Kirish qismida tanlangan mavzuni dolzarbligi asoslanadi va qolgan qismlarni qisqacha mazmuni keltiriladi. Kirish qismining hajmi 1-2 betdan oshmasligi kerak. Asosiy qismda korxona faoliyati va tarkibi to‘g‘risida qisqacha ma’lumot, texnologik obyekt va jarayon tavsiflari, jarayonlarni avtomatlashtirish darajasi, qo‘yilgan masalaning yechish usullari, dasturiy ta’minot arxitekturasi, dastur modullari va ular orasidagi bog‘liqliklar ko‘rsatilishi zarur. Asosiy qismining hajmi 15-20 betdan oshmasligi kerak.