Pedagogik faoliyatning g‘oyaviy asosi sifatida uning insonparvar yo‘nalganligini olish mumkin. Hozirgi zamon ta’limida insonparvarlik tamoyili ta’limni insonparvarlashtirish tendensiyasi ko‘rinishida amalga oshirilyapti. Insonparvarlik – inson deb nomlangan qadriyatni shaxs sifatida tan olish, uning qadr-qimmati va or-nomusini qadrlashga asoslangan g‘oya va qarashlarni bildiradi. O‘zbekiston Respublikasining “Ta’lim to‘g‘risida”gi Qonunining 3-moddasida ta’lim va tarbiyaning insonparvar, demokratik xarakterda ekanligini ta’minlash dolzarb masalalardan biri sifatida ta’kidlangan.