Kar va zaif eshituvchi bolalarni ijtimoiy hayotga tayyorlashda kasblarning ahamiyati. Ijtimoiylashuv va moslashuv o‘zaro chambarchas bog‘liq jarayon bo‘lib, shaxsning oila, mahalla, keng jamoatchilik bilan o‘zaro munosabatlarining yakdilligini o‘zida namoyon etadi. Ijtimoiy moslashuv (Socialis - ijtimoiylashgan) - shaxs tomonidan muayyan madaniyat an’analariga xos bo‘lgan faoliyat va xulq-atvor me’yorini o‘zlashtirish, qadriyatlar va tartib qoidalarni anglash jarayoni. Ijtimoiy moslashuv individning shaxsga aylanish jarayoni ostida kechuvchi qayta aloqaning sifati bilan bog‘liq tushuncha hisoblanadi. Shaxs hayoti davomida ehtiyojlarini qondirishi, o‘zi va o‘zgalar manfaatlarini ko‘zlagan holda ma’lum harakatlarni amalga oshirishi uning boshqa insonlar bilan o‘zaro muloqoti orqali amalga oshiriladi. Ijtimoiy moslashuv shaxslararo munosabat uchun maqbul muhit vujudga kelganda amalga oshadi. Nogironligi bo‘lgan, shu jumladan kar, zaif eshituvchi o‘smir bolalarni ijtimoiy hayotga moslashtirishga ta’sir etuvchi omillar mavjud bo‘lib ularni qo‘yidagicha tasnif etish mumkin: jismoniy va aqliy imkoniyati cheklanganlik, ehtiyojmandlik, ayirmachilik, kamsitilishlar, boqimandalik, bepisandlik, ishonchsizlik. Ular ushbu toifa bolalarni ijtimoiylashtirish yo‘lidagi asosiy to‘siqlardir. Ijtimoiy himoyaga muhtoj o‘smir bolalar guruhi bilan olib boriladigan tarbiyaviy ishlarni mazmunan, shaklan hamda metodik jihatdan tashkil etish boshqa toifa bolalari bilan olib boriladigan tarbiyaviy ishlarga nisbatan birmuncha mas’uliyatli yondashuvni taqozo etadi.