O‘zbekiston Respublikasida jinoyatchilikka qarshi kurashish, ayniqsa xotin-qizlar o‘rtasida sodir etilayotgan jinoyatlarning oldini olish borasida ijtimoiy profilaktika asosiy strategik yo‘nalishlardan biri sifatida qaralmoqda. Ijtimoiy profilaktika — bu jinoyat sodir bo‘lishining oldini olishga yo‘naltirilgan tizimli va uzviy chora-tadbirlar majmuidir. Xotin-qizlar jinoyatchiligini oldini olishga doir profilaktik ishlar uch asosiy bosqichda olib boriladi: 1. Birlamchi profilaktika – jinoyatga moyilligi yo‘q, biroq ijtimoiy xavfli muhitda yashayotgan shaxslar bilan ishlash; 2. Ikkinchi darajali profilaktika – muayyan xavf guruhiga kiruvchi, ya’ni ijtimoiy-iqtisodiy muammolari mavjud bo‘lgan ayollar bilan individual ish olib borish; 3. Uchinchi darajali profilaktika – jinoyat sodir etgan, sudlangan yoki jazoni o‘tab chiqqan ayollarning jamiyatga qayta moslashuvi va reabilitatsiyasini ta’minlash.