O‘zbekiston Respublikasi mustaqillikka erishgach, mamlakatning siyosiy, huquqiy va ijtimoiy hayotida tub o‘zgarishlar yuz berdi. Avvalo, demokratik huquqiy davlat va fuqarolik jamiyatini barpo etish milliy taraqqiyotning bosh maqsadi sifatida ilgari surildi. Bu yo‘lda 1992-yilda qabul qilingan Konstitutsiya asosiy huquqiy poydevor bo‘ldi. Unda inson huquq va erkinliklari, davlat hokimiyatining bo‘linishi, siyosiy partiyalar va jamoat tashkilotlarining faoliyati, fuqarolarning o‘zini-o‘zi boshqarish huquqlari mustahkamlab qo‘yildi.