Rossiya imperiyasi XIX asr oxiri—XX asr boshlarida cheklanmagan monarxiya bo‘lib, butun hokimiyat podsho qo‘lida to‘plangan edi. Podsho hokimiyatining asosiy tayanchi pomeshiklar hamda pravoslav cherkovi edi. Podsho xonadonining o‘zi eng katta pomeshik bo‘lib, 7 mln. desyatina yerga egalik qilardi. Pomeshik xo‘jaligi Rossiyaning kapitalistik taraqqiyoti yo‘lidagi asosiy to‘siq edi. Podsho Rossiyasida burjuaziya sinfi ham bor edi, lekin ularning siyosiy nufuzi past edi. Rossiya agrar-industrial davlat edi va aholisi 85% qishloqlarda yashardi.