Quloqning anatomik tuzilishi haqida tushuncha beradi. Eshituv a’zosi tovush to‘lqinlarini masofada aniqlash vazifasini bajaradi. U kichik bo‘lsada juda murakkab tuzilgan va o‘ziga xos anatomik, fiziologik xususiyatlarga ega. Inson qulog‘i 3 qismdan tashkil topgan: tashqi, o‘rta va ichki. Tashqi quloq (aurus externa) quloq suprasi (auricula) va tashqi eshituv yo‘lidan (meatus acuticus externa) tuzilgan. Quloq suprasi (auricula) chakka-pastki jag‘ bo‘g‘imi va so‘rg‘ichsimon o‘siq orasida joylashgan va qalinligi 0,5-1 mm teng elastik tog‘aydan iborat. Unda tog‘ay usti pardasi va teri bilan qoplangan tashqi (bo‘rtgan) va ichki (botgan) yuzasi tafovut qilinadi. Quloq suprasining erkin cheti oldinga biroz qayrilib burma (helix) hosil qiladi.