Kamqonlikka – ko‘p omilli, patologik jarayon sifatida qarash umumiy qabul qilingan bo‘lib, bu kasallikda qon tarkibida gemoglobin umumiy miqdorining kamayishi kuzatiladi. Temir tabiatda keng tarqalgan, o‘zgaruvchan valentli element. Inson organizmida 4-5 g temir bo‘ladi, uning 65-67 foizi gemoglobin, qolgan qismi esa jigar, qoratalok va iliqda zahira holida to‘planadi. Odam organizmining temirga sutkalik talabi 1-2 mg. Birlashgan Millatlar Tashkilotining (BMT) ekspertlarining ta’kidlashicha, organizmning temirga bo‘lgan fiziologik extiyoji, bu organizm tomonidan o‘zlashtirilishi lozim bo‘lgan va sutka davomida organizm tomonidan yo‘qotilgan temir miqdori o‘rnini bosadigan va yangi to‘qimalar hosil bo‘lishini ta’minlaydigan temir miqdoriga teng. Temir – gemoglobin, mioglobin, sitoxromlar, peroksidaza va katalaza fermentlarining asosiy tarkibiy qismi bo‘lib, u to‘qimalarga kislorod tashish, to‘qimalar nafas olishida hosil bo‘ladigan sof radikalli peroksidlarni olib chiqarib tashlashda (organizmni tozalashda) ishtirok etadi. Samarali eritropoez (eritroblastlarning gemoglobin bilan tuyinishi) uchun organizmda temir moddasi etarli bo‘lishi shart. Temir moddasining etilgan eritrotsitlarga o‘tkazilishi asosan retseptorlarda transferindan ajralish yo‘li bilan vujudga keladi.