Operatsiya maydonchasiga ishlov beriladi, atrofiga sterilizatsiya qilingan choyshablar o‘rnatiladi. Mahalliy infiltratsion anesteziya o‘tkaziladi. Chap qo‘lning ko‘rsatkich barmog‘i bilan tush-o‘mrov-so‘rg‘ichsimon muskulining orqa qirg‘og‘i o‘rtasida yumshoq to‘qimalar bosiladi. Shprits ignasi barmoqning uchi yonida sanchiladi. Igna ichkariga IV bo‘yin umurtqasi ko‘ndalang o‘simtasining old yuzasi yo‘nalishida o‘tkaziladi. Ignani ichkariga va biroz yuqoriga 4–6 sm chuqurlikga kiritish lozim. Umurtqaning old-yonbosh yuzasiga yetgandan so‘ng, shprits chiqarib olinadi, igna esa qoldiriladi. Bo‘yin qon tomirlari teshilmaganligiga ishonch hosil qilgandan so‘ng (ignadan qon oqmaydi), 30–50 ml 0,25% li novokain eritmasi yuboriladi. Igna chiqarib olinadi, igna sanchilgan joyga yod nastoykasi so‘rilib, sterillangan bog‘lam qo‘yiladi. Blokada natijasida Klod Bernar – Gorner sindromi paydo bo‘ladi.