Zamonaviy qurilish sanoatida innovatsion texnologiyalarni joriy etish korxonalar samaradorligini oshirishning muhim omillaridan biri hisoblanadi. Shunday texnologiyalardan biri — Building Information Modeling (BIM) bo‘lib, u qurilish obyektlarini loyihalash, qurish va ekspluatatsiya qilish jarayonlarini raqamli muhitda boshqarish imkonini beradi. BIM texnologiyasi qurilish obyektining uch o‘lchamli (3D) modeli asosida ishlaydi va unda loyiha bo‘yicha barcha ma’lumotlar — texnik parametrlar, materiallar, xarajatlar va vaqt jadvali birlashtiriladi. Bu esa qurilish jarayonining barcha bosqichlarini yagona tizimda ko‘rish va boshqarish imkonini beradi.