Organik kimyo — uglerod atomlari va ularning hosil qiladigan birikmalarini o‘rganadigan fandir.  Bu sohaga kiruvchi moddalar soni millionlab bo‘lib, ular hayotning deyarli barcha jabhalarida uchraydi: tirik organizmlar, oziq-ovqat, kiyim-kechak, yoqilg‘i, polimer materiallar va, albatta, dori vositalari.  Uglerod atomining o‘ziga xos xususiyatlari, jumladan, to‘rt valentlikka ega bo‘lishi, bir-biri bilan zanjir va halqa shaklida bog‘lanish qobiliyati organik moddalar xilma-xilligini yuzaga keltiradi.    Farmatsiya sohasida organik kimyo alohida o‘rin tutadi, chunki mavjud dori vositalarining 90 foizdan ortig‘i organik tabiatga ega. Masalan, aspirin (asetilsalitsil kislotasi), ibuprofen, paratsetamol, penitsillin antibiotiklari, shuningdek, ko‘plab vitaminlar organik molekulalardir.  Shu bois farmatsevtika talabalari uchun organik kimyoni mukammal o‘rganish dori yaratish, ularning ta’sir mexanizmlarini tushunish va yangi bioaktiv moddalar ishlab chiqishda zaruriy asos hisoblanadi.