AnnotatsiyaUshbu ishda konchilikda bajariladigan geodezik va o‘lchov ishlari mazmuni yoritilgan. Topografik tayyorlov ishlari kon hududining relyefi, joylashuvi va konturlarini aniqlash hamda plan va xaritalarni tuzishni o‘z ichiga oladi. Geometrik o‘lchov ishlari yordamida chuqurlik, qiyalik, masofa, hajm va burchaklar aniqlanadi. Nazorat o‘lchovlari esa qazish jarayonida yo‘l qo‘yilgan xatoliklarni aniqlash va bortlarning xavfsizlik holatini baholash uchun amalga oshiriladi. Shuningdek, kon massalarining hisobini yuritish orqali qazib olingan, ko‘chirilgan va tashilgan jinslarning hajmi aniqlanadi. Qazish frontlarini rejalashtirish esa texnika harakati uchun optimal yo‘nalishlarni tanlashga xizmat qiladi. Mazkur jarayonlar kon ishlari xavfsizligi, iqtisodiy samaradorlik va ishlab chiqarishning uzluksizligini ta’minlashda muhim ahamiyat kasb etadi.