Keyinirek jelkenli kemeler payda boldı. Toqımashılıq úskeneleri oylap tabıldı. Ónermentshilik rawajlana basladı. XV — XVI ásirlerge kelip domna pechleri qurıldı. Áskeriy texnikada ot atıw quralları, mashina hám mexanizmler payda boldı. XVIII ásirdiń aqırında puw mashinası hám toqımashılıq mashinaları islep shıǵıldı. XIX ásirde baspa mashina, telegraf apparatı, fotografiya, ishki janıwshı dvigateli, radio, telefon kinomatografiya, avtomobil islep shıǵıldı, áskeriy texnika, temir jol transportı rawajlandı. Fizika hám texnika XX ásir dawamında rawajlandı. Elektr energiyasın islep shıǵarıw hám onnan paydalanıw keń kólemde ámelge astı, elektr energiyası barlıq tarawlarǵa kirip bardı. Mashinasazlıq, aviaciya, atom texnikası, kibernetika hám esaplaw texnikası, elektronika, televidenie, raketasazlıq, avtomatika, kosmonavtika, axborot texnologiyası hám basqa tarawlar joqarı dárejede rawajlandı. Sanaat, awıl xojalıǵı, xızmet kórsetiw, ilim, aǵartıwshılıq, mádeniyat, sport, qurılıs, transport, baylanıs, energetika hám basqa tarawlar texnikanıń jetiskenlikleri menen qurallandırıldı. XXI ásirde axborot texnologiyası, biofizika hám nanotexnologiya tarawlarında ullı ashılıwlardıń bolıwı boljanbaqta.