Geografiya fani tabiat va jamiyat o‘rtasidagi murakkab munosabatlarni o‘rganishga qaratilgan bo‘lib, bu jarayonda kuzatuv usuli muhim metodlardan biri hisoblanadi. Kuzatuv o‘quvchilarda mustaqil fikrlash, mantiqiy xulosa chiqarish va tabiatga bo‘lgan qiziqishni shakllantiradi. Kuzatish orqali o‘quvchilar yangi bilim va tushunchalarni bevosita tajriba asosida o‘zlashtiradilar. Masalan, atmosfera hodisalari, iqlim o‘zgarishlari, tuproq turlari yoki suv aylanish jarayonlarini sinfda nazariy tarzda o‘rganish bilan birga, amaliy kuzatishlar orqali chuqurroq anglashadi. Geografik kuzatuvlar orqali o‘quvchilarda ekologik madaniyat elementlari – tabiatga e’tiborli munosabat, ekologik muammolarga befarq bo‘lmaslik, ekologik toza turmush tarzini shakllantirish mumkin.