Jinoyat protsessual huquqida protsessual majburlov choralari, protsessual majburiyatlar va sud majlisida tartibni buzganlik uchun javobgarlik muhim nazariy va amaliy ahamiyatga ega bo‘lgan institutlardandir. Bugungi kunda jinoyat ishlarini yuritishda qonuniylik, tezkorlik va adolat prinsiplariga rioya qilishda ushbu chora-tadbirlar muhim vosita sifatida xizmat qiladi. Ayniqsa, sud jarayonlarida tartibni saqlash, ishtirokchilarning qonuniy harakatlari va zimmasidagi majburiyatlarni to‘liq bajartirish orqali jinoyat protsessining samaradorligi ta’minlanadi. Shu nuqtai nazardan olib qaraganda, mazkur institutlarni chuqur o‘rganish, ularning huquqiy asoslari va amaliy qo‘llanilishini tahlil qilish bugungi huquqiy islohotlar doirasida dolzarb masalalardan biri hisoblanadi.