Jahon xo‘jaligi rivojlanishining XX asr oxiridagi asosiy tendensiyalaridan biri bu globallashuvdir. Ilgari milliy xo‘jaliklar o‘rtasidagi munosabatlar ko‘proq mintaqaviy tashkilotlar yoki davlatlararo ikki yoqlama shartnomalar asosida rivojlantirilgan bo‘lsa, iqtisodiyotning umumbashariy tus  olishi  natijasida bu jarayon yanada chuqurlashib, mamlakatlar iqtisodiyotining o‘zaro bog‘liqlik darajasi ortdi. Xalqaro iqtisodiy integratsiya alohida olingan mamlakatlar xo‘jalik-iqtisodiy va siyosiy tizimining o‘zaro birlashishi  va  qo‘shilishini bildiruvchi jarayon bo‘lib, bunda oqilona mehnat taqsimoti va ixtisoslashish natijasida turli darajadagi hamkorlik aloqalari iqtisodiy  va  ijtimoiy samara  beradi, hamda barqaror iqtisodiy  hamkorlik munosabatlar yo‘lga qo‘yildi. Iqtisodiy integratsiya jarayonlari pirovardida takror ishlab chiqarish va  savdo aloqalari uzviy xarakter kasb etadi, integratsion hamkorlikka a‘zo har bir mamlakat o‘zi uchun qulay shart-sharoitlarga ega bo‘ladi. Xalqaro iqtisodiy integratsiya jahon xo‘jaligining uzoq tarixiy taraqqiyoti natijasi bo‘lib,  bir nechta bosqichlarda rivojlanadi.