2023 yildan «O‘zbekneftgaz» aksiyadorlik jamiyati tomonidan bosimi pasayib borayotgan konlarda tabiiy gaz qazib chiqarish hajmini barqaror saqlab turish maqsadida kichik kompressor stansiyalarini qurish loyihasi boshlangan edi. Ushbu kichik stansiyalar qurilishi qisqa vaqt va kam mablag‘ talab etilishi, o‘z navbatida samaradorligi bilan ham ahamiyatlidir. Xuddi shunday ikkita stansiya Muborak neft va gaz qazib chiqarish boshqarmasiga qarashli «Cho‘lquvar» va «Girsan» konlarida Xitoydan uskunalar olib kelingach, ikki oy muddatda qurib ishga tushirildi. Ommaviy axborot vositalari vakillari uchun tashkil etilgan press-turda stansiyalarning mavjud tabiiy gaz zaxiralarini maksimal darajada o‘zlashtirishdagi xizmati haqida ma’lumot berildi.