Hozirgi davrda rivojlangan mamlakatlarda, ayniqsa AQShda, davlat qarzining dinamikasi va ta’siri global iqtisodiyot uchun muhim masalalardan biri hisoblanadi. Dunyo iqtisodiyotining yetakchi kuchlaridan biri bo‘lgan AQShning davlat qarzi yildan-yilga ortib bormoqda va bu jarayon iqtisodiy, siyosiy hamda moliyaviy jihatdan keng muhokamalarga sabab bo‘layotgan mavzulardan biri hisoblanadi. Davlat qarzi mamlakat iqtisodiyotining asosiy ko‘rsatkichlaridan biri bo‘lib, uning ortishi yoki kamayishi milliy iqtisodiyot barqarorligiga hamda xalqaro moliya bozorlariga sezilarli ta’sir ko‘rsatadi. So‘nggi o‘n yilliklarda AQShning davlat qarzi hajmi rekord darajaga yetdi va bu holat turli omillar, jumladan, budjet tanqisligi, soliqlar va xarajatlar balansi, pandemiya kabi inqirozlar hamda geosiyosiy omillar ta’sirida vujudga kelgan[1]. Shuningdek, davlat qarzi iqtisodiy o‘sishning tezlashishi yoki sekinlashishiga, inflyatsiya va foiz stavkalariga, investitsiya muhitiga ham ta’sir etuvchi omillardan biri hisoblanadi. Ayniqsa, AQShning davlat qarzi hajmining ortib borishi global moliya tizimiga ham ta’sir ko‘rsatib, boshqa davlatlarning iqtisodiy barqarorligiga ham muayyan xavf tug‘dirishi mumkin. Shu sababli, davlat qarzi muammosi va uning tahlili bugungi kunning eng dolzarb iqtisodiy masalalaridan biri bo‘lib, uning oqibatlari va boshqaruv strategiyalarini o‘rganish zarur. Ushbu kurs ishi doirasida rivojlangan mamlakatlarda, ayniqsa AQSh misolida, davlat qarzining dinamikasi, shakllanishi, sabablari va ta’siri chuqur tahlil qilinadi hamda ushbu muammoning yechimlari bo‘yicha ilmiy asoslangan takliflar beriladi. [1]Mamarahimov B.E., Mamatov M.A. "Iqtisodiy siyosatga kirish" // Innovatsion rivojlanish nashriyot-matbaa uyi. – 2021-yil.