ВАЛЮТА СИЁСАТИНИ ЛИБЕРАЛЛАШТИРИШ ШАРОИТИДА КИЧИК БИЗНЕС СУБЪЕКТЛАРИНИ КРЕДИТЛАШНИНГ ДОЛЗАРБ МАСАЛАЛАРИ Маълумки, Ўзбекистон Республикаси Президентининг 2017 йил 2 сентябрдаги ПФ- 5177-сонли “Валюта сиёсатини либераллаштириш бўйича биринчи навбатдаги чоратадбирлар тўғрисида”ги фармонига асосан 2017 йилнинг 5 сентябридан бошлаб республикамизда валюта сиёсатини либераллаштириш бошланди. Валюта сиёсатининг либераллаштирилиши кичик бизнес субъектлари фаолиятини ривожлантириш, уларнинг экспорт салоҳиятини юксалтиришга кучли туртки беради. Чунки, ушбу Фармонга мувофиқ, юридик ва жисмоний шахсларга, шу жумладан, кичик бизнес субъектларига чет эл валютасини эркин сотиб олиш ва сотиш ҳамда ўз маблағларини ўзининг ҳоҳишига кўра эркин тасарруф этиш ҳуқуқи берилди. Бундан ташқари, мулкчилик шаклидан қатъий назар, барча экспортчи корхоналарнинг, шу жумладан, кичик бизнес субъектларининг экспорт тушумини мажбурий сотиш талаби бекор қилинди. Шу ўринда таъкидлаш жоизки, валюта сиёсатини либераллаштириш натижасида миллий валютанинг сезиларли даражада қадрсизланиши юз берди. 2017 йилнинг 5 сентябрига қадар сўмнинг 1 АҚШ долларига нисбатан номинал алмашув курси 4210,00 сўм бўлгани ҳолда, мазкур йилнинг 5 сентябрида миллий валютанинг курси 8100,00 сўмни ташкил этди. Бунинг натижасида кичик бизнес субъектларининг тижорат банкларидан олган хорижий валютадаги кредитларни қайтариш харажатлари кескин ошиб кетди. Бу эса, уларнинг ликвидлилигига ва тўловга қобиллигига нисбатан салбий таъсирни юзага келтирди