Kirish Dissertatsiyasi mavzusining asoslanishi va uning dolzarbligi. Respublikamizning barcha hududlarida (shahar, tuman, qishloq) jahon standartlariga mos sport inshootlari o‘ziga xos go‘zal infrastrukturalari bilan birgalikda bunyod etilgan. Mazkur sport sohasidagi ishlar ayni kunda amaldagi xalqchil siyosatni yanada jadal davom ettirayotgan yurtimizning bugungi yo‘lboshchisi Sh.M.Mirziyoyevning g‘ayrat-shijoati va konseptual dasturlari asosida o‘z ko‘lamini kengaytirmoqda. Jismoniy tarbiya va sport, shu jumladan, professional sport ham, tezkor sur’atlar bilan rivojlanib bormoqda.[1] Sportchilarimiz Jahon, Osiyo musobaqa va Olimpiya o‘yinlari miqyosida yuksak natijalarga erishib, Vatanimiz shuhratini jahon spor minbarlarida bayrog‘imiz va madhiyamizni tarnnum etib kelmoqda. Shuningdek, musobaqalarda keskinlashib borayotgan raqobat yuksak mahoratli sportchilar tarkibini kengaytirish, ommaviy sportdan professional sportga o‘tish sur’atini jadallashtirish zaruriyatini tug‘dirmoqda. Sport tarixiga nazar tashlasak 2000-yildan boshlab yurtimizda joriy etilgan “Umid nihollari”, “Barkamol avlod” va “Universiada” kabi ommaviy sport musobaqalari saviyasini ko‘tarish o‘ta muhim ahamiyat kasb etadi. Jismoniy tarbiya va sportni yanada ommalashtirish, uni xalqimiz, ayniqsa, o‘quvchi-yoshlarimiz hayotining kundalik ehtiyojiga aylantirish, professional sport salohiyatini yanada ko‘tarish ishlarini jadallashtirishga qodir raqobatbardosh kadrlar tayyorlash, ularning malakasini oshirish, ixtisoslashgan ta’lim muassasalari faoliyatida - zamonaviy bilim berish, o‘rgatish (o‘qitish) sifatini ko‘tarish, ushbu jarayonda ilg‘or texnologiyalar va xorijiy tajribalardan foydalanish maqsadga muvofiqdir.[2] Mazkur muammolar еchimi, o‘z navbatida, xalqaro mezonlarga mos o‘quv adabiyotiarini yaratish bilan bog‘liqdir. Badminton o‘quv fani sifatida O‘zbekiston davlat jismoniy tarbiya institutining o‘quv rejasiga kiritildi (2014-yil) va shu yildan boshlab ushbu yo‘nalishda kadrlar tayyorlash amalga oshirila boshlandi.[3] Mustaqillikka erishgan ilk kunlardan boshlab bugungi kungacha badminton yurtimizda borgan sari ommalashib bormoqda. Ta’lim muassasalarida, mahallalar, dam olish va sog‘lomlashtirish maskanlarida katta-kichik yoshli sport ixlosmandlarining badminton o‘ynayotganlari ko‘zga tashlanadi. Respublikamiz hududlarida bolalar, o’smirlar, yoshlar va professional badmintonchilar o‘rtasida turli musobaqalar o‘tkazish an’anaga aylanib bormoqda. So‘nggi yillarda o‘zbek badmintonchilari nufuzli xalqaro musobaqalarda (Osiyo o‘yinlari, chempionatlar, kubok musobaqalari, turnirlar) munosib ishtirok etib, hatto sovrinli o‘rinlarni egallashga muvaffaq bo‘lmoqdalar. Shu bilan birga, mamlakatimizning barcha hududlarida ommaviy sportning inson va oila hayotidagi muhim ahamiyati, uning jismoniy va ma’naviy sog‘lomlikning asosi ekanini targ‘ib-tashviq qilish, hayotga katta umid bilan kirib kelayotgan yoshlarni zararli odatlardan asrash, ularga o‘z qobiliyat va iste’dodlarini ro‘yobga chiqarishlari uchun zarur shart-sharoitlar yaratish, ular orasidan iqtidorli sportchilarni saralab olish hamda maqsadli tayyorlash tizimini takomillashtirish borasida muhim va dolzarb vazifalar turibdi. [1] A.A.PuIatov, O.M.Savatyugin, Sh.Sh.Isroilov. Badminton nazariyasi va uslubiyati. (O‘quv qo‘llanma). – T.: «Fan va texnologiya», 2017, 3-bet. [2] Daniyeva. Ya. Ch, Berdiyeva. X. K . Jismoniy tarbiya va sport fanidan nazariy va amaliy mashg‘ulot materiallari. o‘quv qo‘llanma.Termiz-2020. [3] https://lex.uz/m/acts/-2336276.