Sport biomexanikasi fanining obyekti, predmeti, maqsadi va vazifalari. Sport biomexanikasining ilm-fan sifatida shakllanishi va rivojlanish tarixi. Reja: 1. Sport biomexanikasining predmeti. 2. Sport biomexanikasining maqsadi va vazifalari. 3. Sport biomexanikasining nazariyasi. 4. Sport biomexanikasining metodi. 1.1. Sport biomexanikasining predmeti XX asr o‘rtalarigacha “Biomexanika” deganda inson va hayvonlarning harakatlari to‘g‘risidagi fan tushunilgan. Biroq, keyinchalik biomexanika bo‘yicha tadqiqot chegaralari kengaya bordi. Jumladan quyidagi yo‘nalishlar rivojlandi: Nafas olish apparati biomexanikasining elastik va noelastik qarshiligini, nafas olish harakatlarining kinematikasini (ya’ni, harakatlarning geometrik xarakteristikalarini) va dinamikasini, shuningdek nafas olish apparati faoliyatini yaxlit holda va uning alohida bo‘laklarining (o‘pka, ko‘krak qafasi) faoliyatini boshqa tomonlarini o‘rganadi; qon aylanish biomexanikasi tomirlar va yurakning elastik xossalarini, tomirlarni qon aylanishiga gidravlik qarshiligini, yurakning ishini va boshqalarni o‘rganadi; harakatlar biomexanikasi, anatomiya va nazariy mexanika ma’lumotlariga asoslanib, harakatlanish organlari tuzilishini, bo‘g‘inlarda harakatlarni chaqiradigan muskul kuchlari qo‘yilishi (ta’sir yetishi) xarakterini, bo’linishlar kinematikasini, gavda massasini uning zvenolari bo‘yicha taqsimotini, ushbu zvenolar va gavdani yaxlit holda harakatlanish qonuniyatlarini o‘rganadi, ta’sir etuvchi kuchlarning xarakterini, yo‘nalishini va ahamiyatini aniqlaydi. Harakatning biomexanik xarakteristikasi strukturaviy, kinematik va dinamik tahlil asosida tuziladi. Strukturaviy tahlil qilishda jism kinematik zanjirlarining erkinlik darajasi soni, ularning xarakteri (ochiq, yopiqligi) aniqlanadi; kinematik tahlil harakat xarakteristikalarini (traektoriya, tezlik va tezlanishni) beradi; dinamik tahlil - ichki va tashqi kuchlar o‘zaro ta’sirining manzarasini (xossalarini) beradi.