Ўзбекистонда бошқариш усулларининг хусусиятлари Ўзбекистонда мустақилликнинг тантана қилиниши ва ижтимоий – иқтисодий, сиёсий ҳамда маданий ислохотларнинг давом этиши давлатни идора қилиш ва барча фаолиятларни ташкил қилишда янгича иш усулларини қўллашни тақозо этади. Бу усулларнинг шакли, мазмуни ва асосий мақсадлари қабул қилинган қонунлар, қарорлар ва Ўзбекистон президенти И.А.Каримовнинг асарлари, нутқлари, маърузалари ва турли учрашувлардаги баёнотларида ўз аксини топмоқда. Бу жараёнлар жисмоний тарбия ва спорт ташкилотлари фаолиятларига ҳам тегишлидир. Жисмоний тарбия ва спорт ишларини бошқаришнинг ўзига хос хусусиятлари, йўллари ва шакллари кун сайин бойиб, равнақ топмоқда. Ўзбекистонда турли идоралар ҳамда савдо, тижорат, ширкат, фермер хўжаликларининг вужудга келиши жисмоний тарбия ва спорт соҳасидаги бошқариш усулларининг янги тартиб қоидаларига риоя қилишни тақозо этмоқда. Чунки бундай идоралар, ҳўжалик ташкилотлари ва бошқа жамоалар ўз фаолиятларини махсус Низомлар асосида ташкил этмоқда. Бу ташкилотлар асосан ўзини ўзи бошқариш, молиявий таъминот ҳусусиятига эга бўлган ҳолда мустақил равишда фаолият кўрсатиш ҳуқуқларига эгадир. Шу сабабдан ҳам спорт ташкилотлари бундай йўналишдаги идоралар, ташкилотлар ҳамда ҳўжалик жамоалари билан ўзаро келишилган ҳолда иш олиб боришларига тўғри келади.