Parafin uglevodorodlar. Gaz holidagi paraffin uglevodorodlar. Suyuq paraffin uglevodorodlarning qo’llanilishi. Reja: 1. Parafin uglevodorodlar haqida umumiy tushuncha. 2. Gaz holdagi parafin uglevodorodlar. 3. Suyuq parafin uglevodorodlar. 4. Qattiq parafin uglevodorodlar. 5. Parafin uglevodorodlarining qo’llanilishi. Neftkimyo sanoati uchun xomashyo sifatida ishlatiladigan para­fin uglevodorodlarga, birinchi navbatda, quyi molekular C1-C5 pa­rafin uglevodorodlar kiradi. Uglerod atomlari soni 6-10 dan iborat bo‘lgan parafin uglevodorodlar chegaralangan miqdorda ishlatiladi. C10-C20 va C20-C40 parafin uglevodorodlarida sintetik yuvish vositalari yarim mahsulotlarini ishlab chiqarishda keng ko‘lamda foydalaniladi. Parafin uglevodorodlarni ishlatishda oqsil-vitaminli konsentratlarni bakteriyalar vositasida bijg‘itish usuli bilan olish yangi yo‘nalish hisoblanadi. Parafin uglevodorodlar uch turga – gaz holatdagi, suyuq va qattiq turga bo‘linadi. Gaz holatdagi parafin uglevodorodlar Gaz holatdagi parafin uglevodorodlarga metan, etan, propan, butan va izobutan kiradi. Tabiiy gazlar bevosita yer qa’ridan qazib chiqariladi; tabiiy gaz ko‘pincha neft qazib chiqarishda yo‘ldosh gazlar sifatida ajralib chiqadi; ko‘p hollarda esa alohida kon hosil qilishi mumkin. Neftkimyo uchun stabilizatsiya gazlari, gaz-kondensat konlari uglevodorodlari, neftni qayta ishlashda hosil bo‘ladigan gazlar katta ahamiyat kasb etadi.