Tanlangan mavzu bo‘yicha adabiyotlar bilan dastlabki tanishish bo‘yicha kurs ishining rejasini tuzish va yoritilajak savollarning qamrovini belgilab olish uchun muhimdir. Kurs ishi rejasi uning yo‘nalishi va maqsadlarini aks ettirishi kerak. Talaba rejani tuzishdan avval kurs ishining muhim savollarini belgilab olish maqsadida asosiy adabiyotlar, darsliklar, o‘quv qo‘llanmalar, vaqtli matbuotda chop etilgan maqolalar, amaliyotda qo‘llanilayotgan me’yoriy hujjatlar bilan tanishib chiqib, mavzuning ham nazariy, ham amaliy tomonlarini aniqlab oladi. Elektron darsliklar bo‘yicha ma’lumotlar bazasi, Internet resurs manbalaridan olingan ma’lumotlar yaqindan yordam berishi mumkin. Ko‘plab maxsus elektron jurnallar, ma’ruza matnlaridan foydalanish tavsiya etiladi.