Boshlang‘ich ta’limda matematika fanini bosqichma-bosqich o‘qitishda “konsentrlar” tushunchasi muhim o‘rin tutadi. Konsentrlar – bu o‘quv dasturida arifmetik bilim va ko‘nikmalarni ketma-ket chuqurlashtirib borish tizimi bo‘lib, unda ma’lum bir oraliqdagi sonlar ustida amallar bajariladi va o‘quvchilar bu bilimlarni mustahkamlab boradi. Konsentrlar tizimi o‘quvchining yosh xususiyatlari, psixologik rivojlanishi va o‘zlashtirish tezligini inobatga olgan holda tuziladi. Har bir konsentrda o‘quvchilar avvalgi bosqichda olgan bilimlarini takrorlash, chuqurlashtirish va yangi bilimlarni bosqichma-bosqich egallash imkoniyatiga ega bo‘ladilar. Masalan, birinchi konsentrda sonlar 1 dan 20 gacha bo‘lsa, ikkinchisida 100 gacha, uchinchi konsentrda esa 1000 gacha bo‘lgan sonlar ustida amallar o‘rgatiladi. Bu uslub orqali o‘quvchilar yirik sonlar bilan ishlashga asta-sekinlik bilan o‘rgatiladi. Konsentr asosida tuzilgan o‘quv jarayonining asosiy afzalliklari quyidagilardan iborat: -Har bir mavzu bosqichma-bosqich takrorlanadi va yangilanadi; -O‘quvchilar o‘z bilimlarini chuqurlashtiradi va mustahkamlaydi; -Har bir konsentrda o‘ziga xos metodik yondashuvlar qo‘llaniladi. Ushbu yondashuv o‘quvchilarda mustahkam, chuqur va tizimli bilim shakllanishiga xizmat qiladi. Chunki bolalar dastlab kichik sonlar bilan ishlashni o‘zlashtirib, keyinchalik kattaroq sonlar ustida ham xatolarsiz amallar bajarishni o‘rganadilar. Bu esa ularning fikrlash, analiz qilish, umumlashtirish ko‘nikmalarini rivojlantiradi. Ayni paytda, konsentr tizimi matematika fanining o‘ziga xos xususiyatlariga mos ravishda tuzilgani sababli, u boshqa fanlarga ham integratsiyalashgan holda o‘rgatilishi mumkin. Jumladan, tabiatshunoslik, texnologiya yoki musiqa darslarida ham matematika elementlari konsentrlar asosida o‘z aksini topishi mumkin.