Kontsentrlar usuli orqali raqamlashga o‘rgatish o‘quvchilarning yoshi va psixologik rivojlanish darajasiga mos holda bilimlarni samarali o‘zlashtirishni taʼminlaydi. Bu yondashuv yordamida raqamlarning o‘zaro bog‘liqligi, ular orasidagi ketma-ketlik va miqdoriy munosabatlar haqida aniq tushunchalar hosil qilinadi. Shu bilan birga, kontsentrlar asosidagi o‘qitish metodikasi ilg‘or pedagogik texnologiyalar, vizual vositalar, hamkorlikda o‘qitish, o‘yinli metodlar bilan uyg‘unlashtirilgan holda zamonaviy dars jarayonining samaradorligini oshiradi. Mazkur mavzuning dolzarbligi shundan iboratki, u boshlang‘ich taʼlimda matematik tayyorgarlikni yanada takomillashtirish, darslarning mazmunan boy va didaktik jihatdan samarali tashkil etilishiga xizmat qiladi. Bu esa uzluksiz taʼlim tizimida sifatli va izchil matematik tayyorgarlikni taʼminlashning muhim omillaridan biri hisoblanadi.