Xalqaro tajribadan kelib chiqib aytish mumkinki, maktabgacha ta’lim pedagogikasida uch yoshdan olti yoshgacha bo`lgan bolalarga ta’lim tarbiya berishda asosan ikki xil yondashuv mavjuddir. Birinchi yondashuv tarafdorlari bixevioristik tushunchalarning shakllanish manbai bolada emas va ular o`z- o`zidan paydo bo`lmaydi, deb hisoblaydi. Ya’ni barcha tushunchalar bolaga tashqaridan beriladi va u tomondan o`zlashtiriladi. Bixevioristik dasturlar tarbiyachiga yo`naltirilgan va ochiq ifodalangan ta’limga asoslanadi, shu jarayonda bola go`yoki bir bo`sh idish singari asta-sekin mazmun bilan to`ldiriladi. Tarbiyachi ma’lum materialni o`ziga xos tarzda bayon etadi.