Matematika – boshlang‘ich sinf o‘quvchisining tafakkurini shakllantiruvchi, unda tahliliy fikrlash, solishtirish, umumlashtirish, hajm, uzunlik, vaqt va miqdorni his qilish kabi muhim kompetensiyalarni rivojlantiruvchi fanlardan biridir. Ayniqsa, massa va sig‘im o‘lchov birliklari bo‘yicha bilimlar amaliy faoliyat bilan chambarchas bog‘liq bo‘lib, ularning to‘g‘ri o‘zlashtirilishi o‘quvchining kundalik hayotdagi turli muammolarni mustaqil hal qila olishiga zamin yaratadi. Masalan, massa birliklarini bilgan bola bozorda meva-sabzavotning og‘irligini taxminan aniqlay oladi, kilogramm va gramm o‘rtasidagi munosabatni farqlaydi. Sig‘im birliklarini anglagan o‘quvchi esa, litr va millilitrda berilgan miqdorlarni taqqoslash, bir hajmdan boshqasiga o‘tish, suyuqliklar hajmini o‘lchash kabi amaliy topshiriqlarni bajarishga tayyor bo‘ladi. Bu esa, o‘z navbatida, o‘quvchida matematik savodxonlik va amaliy fikrlash malakasini rivojlantiradi.