Matematika faniga o‘quvchilarni yanada qiziqtirish maqsadida ularning qiziqishlarini inobatga olgan holda to‘garak tashkil etiladi. Har qaysi matematika to‘garagiga qatnashgan o‘quvchilar soni 15-20 nafardan oshmasligi zarur. Agar bu to‘garakda qatnashishni xohlaydiganlar soni ko‘paysa, 2 guruhga bo‘lib o‘tish ham mumkin. Bir guruh bilan haftaning bir kunida, ikkinchi guruh bilan haftaning boshqa kunida shug‘ullanish maqsadga muvofiq. Mashg‘ulotlar 30 daqiqadan 40 daqiqagacha bo‘lishi mumkin.Matematika to‘garagining muvaffaqiyatli ishlashida o‘quvchilarni to‘garak ishiga jalb qilishda, qiziqtirishda dastlabki mashg‘ulotlarning roli katta. Biroq, dastlabki mashg‘ulotlarning ko‘pchilik qismini qiziqarli matematikaga ajratib yuborilsa ham yaxshi bo‘lmaydi, chunki keyingi mashg‘ulotlarda qiziqarli matematikadan boshqa materiallarga qiziqish kamayib, ayrim o‘quvchilar to‘garakdan chiqib ketishlari mumkin.