Ona tili — bu inson tafakkurining shakllanishi, milliy o‘zlikni anglash, madaniy merosni saqlash va uni keyingi avlodlarga yetkazishda asosiy vosita hisoblanadi. Ayniqsa, boshlang‘ich sinfda o‘quvchiga ona tilini o‘rgatish nafaqat tilni o‘zlashtirish, balki o‘quvchining umumiy tafakkuri, estetik didi va axloqiy qarashlarini shakllantirishga xizmat qiladi. Shu bois ona tili darslarining mazmuni chuqur o‘ylab ishlab chiqiladi va har bir darsda o‘quvchining bilim, ko‘nikma va malakasini izchil oshirish ko‘zda tutiladi.Ona tili darslarining asosiy mazmuni — bu o‘quvchiga tildagi fonetik, leksik, grammatik birliklarni o‘rgatish, matnni tushunish, tahlil qilish, mantiqiy fikr yuritish, og‘zaki va yozma nutqni rivojlantirishga qaratilgan mashq va topshiriqlar majmuasidir. Darslar jarayonida o‘quvchi faqat qoidalarni emas, balki ularni hayotiy vaziyatlarda qo‘llash, fikrini aniq va ravon bayon etish, muloqotda to‘g‘ri gapirish ko‘nikmalarini ham egallaydi. Ona tili darslarining maqsadi — o‘quvchilarda ona tiliga nisbatan muhabbat va hurmat hissini uyg‘otish, ularning og‘zaki va yozma nutqini to‘g‘ri, mantiqli, grammatik jihatdan savodli shakllantirishdir. Shuningdek, tilni o‘rganish orqali o‘quvchilarda estetik did, muloqot madaniyati, axloqiy tushunchalar singdiriladi.