Bugungi kunda ta'lim sifatini oshirish, o‘quvchilarning bilim, ko‘nikma va kompetensiyalarini xalqaro me'zonlar asosida baholash har qachongidan ko‘ra dolzarb masalaga aylangan. Globallashuv va raqobatbardoshlik kuchaygan bir davrda mamlakatlar o‘z ta’lim tizimlarining samaradorligini aniqlash, uni xalqaro standartlarga moslashtirish hamda ta’lim jarayonini takomillashtirish zaruratini his qilmoqda. Aynan shu ehtiyoj xalqaro baholash dasturlarining ahamiyatini oshirmoqda. TIMSS, PIRLS, PISA, TALIS va EGMA kabi xalqaro baholash dasturlari dunyo miqyosida o‘quvchilarning bilim va ko‘nikmalarini, o‘qituvchilarning kasbiy malakasi va dars berish uslublarini, ta’lim muhitini har tomonlama tahlil qilish imkonini beradi. Bu dasturlar orqali olinadigan natijalar nafaqat o‘quvchilarning hozirgi bilim darajasini baholaydi, balki ta’lim tizimining umumiy strategik yo‘nalishlarini belgilashda ham muhim o‘rin tutadi. Xalqaro tadqiqotlar natijalari asosida mamlakatlar o‘zlarining kuchli va zaif tomonlarini aniqlab, ta’lim tizimida islohotlar olib borishga intiladi. O‘zbekiston ham so‘nggi yillarda TIMSS, PIRLS, va PISA kabi baholashlarda faol ishtirok etib kelmoqda. Bu ishtirok mamlakatimiz ta’lim tizimining jahon standartlariga yaqinlashishida, ta’lim mazmunini zamonaviylashtirishda, metodik yondashuvlarni qayta ko‘rib chiqishda muhim turtki bo‘lib xizmat qilmoqda. Shu boisdan, ushbu kurs ishida xalqaro baholash dasturlarining mazmun-mohiyati, ularning o‘ziga xos jihatlari, ta’lim sifatiga ta’siri, shuningdek, O‘zbekiston ta’lim tizimidagi amaliy natijalari keng yoritiladi. Har bir dastur bo‘yicha alohida tahlillar keltirilib, ularning o‘rganilishi orqali o‘quvchilarning bilim saviyasi, tanqidiy va amaliy fikrlash qobiliyatlarini aniqlash imkoniyatlari ko‘rsatib beriladi. Kurs ishining maqsadi: - Xalqaro baholash dasturlarining mazmuni, maqsadi va o‘ziga xos xususiyatlarini o‘rganish; - Ushbu dasturlar orqali ta’lim sifatining qanday baholanishini tahlil qilish; - O‘zbekiston o‘quvchilari ishtirok etgan xalqaro baholash natijalarini o‘rganib, xulosalar chiqarish. Kurs ishining vazifalari: 1. Xalqaro baholash tizimlarining kelib chiqishi va rivojlanish tarixini o‘rganish; 2. TIMSS, PIRLS, PISA, TALIS, EGMA dasturlarining mazmuni va baholash mezonlarini tahlil qilish; 3. Har bir dastur bo‘yicha baholash uslublarini o‘zaro taqqoslash; 4. O‘zbekiston o‘quvchilari ishtirokidagi baholash natijalarini tahlil qilish; 5. Ta’lim sifatini oshirish bo‘yicha tavsiyalar ishlab chiqish. Kurs ishining ob’ekti: Umumiy o‘rta ta’lim tizimidagi xalqaro baholash dasturlarining tarkibi va mazmuni. Kurs ishining predmeti: Xalqaro baholash dasturlari orqali o‘quvchilarning bilim va ko‘nikmalarini baholash, natijalar asosida ta’lim sifatini tahlil qilish. Kurs ishining tuzilishi: Kirish, 3 ta bob, 10 §, xulosa, va foydalanilgan adabiyotlar ro‘yxatidan iborat.