Zamonaviy ta’lim tizimining asosiy maqsadlaridan biri o‘quvchilarni nafaqat muayyan bilimlar bilan qurollantirish, balki ularda hayot davomida zarur bo‘ladigan ko‘nikma, malaka va shaxsiy sifatlarni shakllantirishdir. Shu maqsadda ta’limda "Kompetensiya" Tushunchasi markaziy o‘rinni egallamoqda. Kompetensiya — bu shaxsning muayyan vaziyatlarda (o‘quv, kasbiy, shaxsiy) samarali harakat qilish qobiliyati bo‘lib, u bilim, ko‘nikma, malaka, shaxsiy sifatlar, qadriyatlar va tajribalar yig‘indisidir. Tayanch kompetensiyalar esa shaxsning ijtimoiy faoliyatining barcha jabhalarida (mehnat, o‘qish, oila, ijtimoiy hayot) muvaffaqiyatli ishtirok etishi uchun zarur bo‘lgan universal qobiliyatlarning majmuasidir.