Boshlang‘ich sinf o‘quvchilarida kasrlar haqidagi tushunchani shakllantirish – matematik tafakkurning rivoji, sonlar haqidagi bilimlarni chuqurlashtirish va o‘quvchining amaliy ko‘nikmalarini mustahkamlashda muhim bosqich sanaladi. Bu mavzuni o‘qitishda oddiy og‘zaki tushuntirishlar yetarli bo‘lmay, ayniqsa ko‘rgazmalilik, ya’ni ko‘z bilan ko‘rish, tasavvur qilish, modellashtirish orqali o‘rgatish o‘ta muhimdir. Kasrlar – murakkab tushuncha. Ayniqsa, o’nli kasrlar masalasini tushunishda o‘quvchilarning ko‘pchiligi qiyinchiliklarga duch keladi. Bunday hollarda oddiy grafik ko‘rsatmalar, geometrik shakllar, real buyumlar, kompyuter dasturlari yoki interaktiv vositalardan foydalanish – o‘zlashtirish darajasini oshirishda samarali hisoblanadi. Shu bois, mazkur kurs ishi orqali kasrlarni, xususan o’nli kasrlarni ko‘rgazmalilik asosida o‘rgatish metodikasi yoritiladi.