Insoniyat paydo bo‘lishi va tarixiy shakllanish bosqichlarida uning yangilik va o‘zgarishlarga intilishlar har doim oshib borgan. Ijtimoiylashuv jarayonlarining jadallashuvi va gumanizmning rivojlanib borishi intellektual mulk egalarini va uning mehnat mahsulini muhofoza qilish jarayonlarida ko‘plab muammolarga duch kelgan. Jamiyat taraqqiyotida ilm-fan va boshqa sohalardagi ilmiy yutuqlar juda yuqori ahamiyat kasb etib borishi bilan butun jamiyat oldida muallif huquqni aniq meyor bilan belgilash va uning har tomonlama asoslangan himoyasini ta’minlash va shu orqali haqiqiy ma’noda intellektual salohiyatga munosiblikni yaratish global ahamiyat kasb etib bormoqda. Butun dunyoda mualliflik huquqi masalasi bo‘yicha mavjud muammolarni kelib chiqish omillari, muammolarning muayyan shaxs yoki jamiyat uchun keltirib chiqarishi mumkin bo‘lgan xavfi, mualliflik huquqi masalasining nazariy va metodologik tahliliga oid ilmiy izlanishlar olib borilmoqda. Shuningdek, mualliflik huquqini to‘laqonli ta’minlash, ehtimoliy muammolarning bartaraf etilishi, mualliflik huquqini kafolatlash, mualliflik huquqi qonun ijodkorligining tashkiliy-huquqiy mexanizmlarini yanada rivojlantirish borasida keng ko‘lamli ishlar amalga oshirilmoqda. O‘zbekiston Respublikasi mustaqilligi barcha sohalarda bo‘lgani kabi mualliflik huquqi muhofozasida ham tub burilishlar yasay oldi. Mustaqillik sharofati bilan xalqimiz tarixini ilmiy, obyektiv va xolis yoritish ziyolilar oldida turgan ustuvor vazifalaridan biriga aylandi.