AKADEMIK LITSEYGA XUSH KELIBSIZ, AZIZ o‘QUVCHILAR! Muhtaram o‘quvchi! Siz mustaqillik sharofati va Prezidentimizning jahon andozalari talablariga to‘la javob beradigan ta’lim tizimini yaratish to‘g‘risidagi tashab­busi asosida ishlab chiqarilgan tamomila yangi tipdagi o‘quv dargohiga — akademik litseyga iqtidorli o‘quvchi sifatida qadam qo‘ydingiz. Siz — erkin va ijodiy fikrlovchi, izlanuvchan, tirishqoq, yangilikka intiluvchi, o‘z Vatanini jon-u dilidan sevuvchi va uning porloq kelajagi uchun ich-ichidan qayg‘uruvchi, zamonaviy bilimlarni egallash uchun charchamas, fidokorlarsiz. Ona tili barcha fanlarni bilishning kaliti sanaladi, shuning uchun ham uni yaxshi egallamasdan turib, boshqa fanlarni chuqur o‘zlashtirish mumkin emas. Zero, nutq insonning ko‘rkidir. lnsonning kimligi uning nutqiga qarab bilinadi. Nutqning ta’sir qilish quvvati kuchli bo‘lganligidan jamiyatni boshqaruvchi kishi­larning eng muhim sifatlaridan biri ham nutq mahoratiga ega bo‘lishi hisoblanadi. Ana shunday sifatga ega bo‘lgan shaxs xalq qalbiga o‘t yoqa oladi, ulkan vazifalarni amalga oshirishga kishilarni da’vat eta oladi. Shunday ekan, Siz qo‘lingizdagi kitobni o‘qish, ona tilingizning ichki qonun-qoidalarini o‘zlashtirish orqali uning boy imkoniyatlarini amaliyotga qo‘llashga, o‘z nutqingizni o‘stirishga, muayyan bir fikrni turli shaklda ifodalashga o‘rganasiz. Ilmni egallash yo‘lida Sizlarga omad yor bo‘lsin!